Mikilvægt er að umfjöllun um loftslagsmál grundvallist á staðreyndum. Markmið sem sett eru um samdrátt í losun gróðurhúsalofttegunda og tilheyrandi aðgerðaráætlanir þurfa að grundvallast á skýrri vitneskju um magn losunar frá ólíkum sviðum samfélagsins og hvað orsakar hana. Í losunarbókhaldi Íslands er losuninni, líkt og hjá öðrum Evrópuríkjum, skipt í þrjá flokka.

Í einum flokki er svokölluð samfélagslosun, en það er öll losun innan hagkerfisins sem er á beinni ábyrgð Íslands. Undir samfélagslosun fellur til dæmis losun frá samgöngum innanlands, sjávarútvegi, landbúnaði, orkuframleiðslu og meðhöndlun úrgangs. Í öðrum flokki er losun sem heyrir undir viðskiptakerfi Evrópusambandsins með losunarheimildir (ETS). Þar undir fellur t.d. losun frá millilandaflugi og skipaflutningum milli landa, auk losunar frá stóriðju, eins og álverum og kísilmálmverksmiðjum. Í þriðja flokkinn fellur svo öll losun og binding sem til fellur vegna landnotkunar, breytinga á landnotkun og skógræktar (LULUCF). Sú losun og binding er einnig á ábyrgð Íslands, líkt og samfélagslosun. 

Hér gefur að líta nokkur staðreyndaskjöl um samfélagslosun á Íslandi. Skjölin sýna magn og þróun losunar á mikilvægum sviðum þjóðlífsins, á hnitmiðaðan og samræmdan hátt. Einnig er farið yfir stöðu aðgerða samkvæmt aðgerðaáætlun Íslands og útlistað með hvaða móti helst er hægt að draga úr losun á hverju sviði fyrir sig.

Staðreyndablöðin voru síðast uppfærð í apríl 2026