28. maí 2026

Fulltrúar sem sátu fundinn: Halldór Þorgeirsson, Brynhildur Davíðsdóttir, Auður Alfa Ólafsdóttir, Bjarni Diðrik Sigurðsson, Bjarni Már Magnússon, Halldór Björnsson, Helga Jóhanna Bjarnadóttir, Stefán Eysteinsson og Þorgerður María Þorbjarnardóttir.

Fundurinn var haldinn á Veðurstofunni, Bústaðarvegi 7.

Guðmundur Steingrímsson, sérfræðingur skráði fundargerð.

Fundargerð seinasta fundar

Fundargerð 96. fundar sem haldinn var 7. maí 2026 var samþykkt með einni leiðréttingu.

Opinber fjármál og loftslagsmál

Gestur: Gunnar Haraldsson, stofnandi Intellecon og fráfarandi formaður fjármálaráðs.

Loftslagsráð hefur fjallað um mikilvægi gagnsæis í ráðstöfun fjármuna til loftslagsmála í útgefnum álitum. Ráðið hefur einnig unnið stærri verkefni þessu tengt en skýrsla Loftslagsráðs um opinber fjármál og loftslagsmál kom út í júní 2022. Samhliða lét ráðið vinna minnisblað um tekjur af uppboði losunarheimilda. Tilgangur þessa verkefna og lengdrar umræðu í Loftslagsráði var að stuðla að gagnsæi varðandi ráðstöfun opinberra fjármuna í þágu loftslagsmarkmiða til að stuðla að samstillingu stefnumörkunar í ríkisfjármálum við stefnumið þjóðarinnar í loftslagsmálum.

Eitt af áhersluverkefnum ráðsins skv. starfsáætlun 2026 eru opinber fjármál, stjórntæki hins opinbera og samlegðaráhrif aðgerða. Til að aðstoða ráðið við það verkefni hefur Gunnar Haraldsson verið fenginn til að vinna að greiningu fyrir ráðið.

Gunnar kynnti tillögur að efnistökum slíkrar greiningar á fundinum og hugmyndir að áherslum. Ráðsmeðlimir lýstu væntingum sínum til vinnunnar og ræddu markmið greiningarinnar og afmörkun efnisþátta. Framkvæmdastjórn mun vinna með Gunnari að frekari skilgreiningu og afmörkun verkefnisins í ljósi umræðu á fundinum.

Skýrsla um votlendi

Loftslagsráð hefur unnið að upplýsandi skýrslu um hvers vegna endurheimta þarf votlendi og hvernig það er að ganga.

Fyrstu fjórir kaflar skýrslunnar voru lagðir fram fyrir fundinn og voru ráðsmeðlimir sammála um að texti þeirra væri nánast tilbúinn, utan einstakra orðalagsbreytinga. Rætt var um fimmta og síðasta kafla skýrslunnar, þar sem horft verður fram á veginn og áherslur Loftslagsráðs um hvað betur megi fara verða settar fram. Umræða fór fram um efnistök þessa kafla og með hvaða hætti ráðleggingum ráðsins yrði best komið á framfæri.

Stefnt er að afgreiðslu skýrslunnar á lokafundir ráðsins 11.júní.

Skýrsla Loftlagráðs um framgang

Drög að frumvarpi til Loftslagslaga var lagt fram á Alþingi í apríl og skilaði Loftslagsráð athugasemdum til umhverfis- og samgöngunefndar 11. maí. Ólíklegt þykir að frumvarpið verði afgreitt á þessu þingi en umhverfis-, orku- og loftslagsráðuneyti mun þó skv. upplýsingum framkvæmdastjórnar vinna skv. því verklagi sem þar er sett fram. Verður því lögð lokahönd á skýrslu verkefnisstjórnar í loftslagsmálum í september.

Stefnir Loftslagsráð einnig á að skila til ráðherra umsögn sinni um framgang aðgerðaráætlunar í loftslagsmálum, eins og kveðið er á um í frumvarpinu. Skýrsla Loftslagsráðs verður lögð fyrir Alþingi næsta haust, ásamt munnlegri skýrslu ráðherra.

Á fundinum fór framkvæmdastjóri yfir stöðu undirbúnings að þessari skýrslugerð og var rætt um nálgun ráðsins og áherslur í þessari vinnu. Umræðunni verið haldið áfram á næsta fundi ráðsins.

Önnur mál

a. Erindi Sjálfbærnistofnunar HÍ um kortlagningu þekkingar

Komið var á framfæri erindi frá Sjálfbærnistofnun Háskóla Íslands um verkefni sem miðar að því að kortleggja þekkingu á aðlögun að loftslagsbreytingum. Markmiðið er að greina stöðu þekkingar á sviðinu og skilgreina helstu þekkingargöt sem kunna að hamla árangursríkri aðlögun á Íslandi. Ráðsmeðlimum er boðið að senda ábendingar til stofnunarinnar.