Áratugurinn frá 2015 til 2025 er sá heitasti sem mælst hefur og ójafnvægi í inn- og útstreymi varma í lofthjúpnum hefur aldrei mælst meira. Þetta kemur fram í  árlegri skýrslu Alþjóðaveðurfræðistofnunnar um stöðu loftslagsins, sem kom út í mars.

Í skýrslunni styðst stofnunin við nokkra lykilmælikvarða til þess að meta ásigkomulag lofthjúpsins og hvernig það hefur áhrif á veðurfar á Jörðu. Í fyrsta skipti er jafnvægi í varmaflæði til og frá Jörðu einn af þessum mælikvörðum, en það hefur verið mælt í sextíu og fimm ár. Hlutfallið milli þess varma sem streymir frá sólinni til Jarðar og þess varma sem Jörðin varpar frá sér aftur út í geim ætti að haldast tiltölulega jafnt ef allt væri með felldu. Nú er ljóst að gróðurhúsalofttegundir hindra útflæði varma frá Jörðu, og því hefur vaxandi ójafnvægi myndast, sem nú hefur aldrei mælst meira.

Varmaorkan safnast fyrir og í skýrslunni er bent á að þessi uppsöfnun geti haft áhrif í þúsundir ára. Yfir 90% af þessum umframhita er numinn af höfunum, og áhrifin á höfin eru orðin veruleg. Þau hafa hlýnað, auk þess sem þau súrna vegna aukinnar upptöku koltvísýrings úr andrúmslofti. Í skýrslunni er áætlað að höfin taki inn um átjánfalt meira magn af orku, árlega, en sem nemur árlegri orkunotkun mannkynsins. Þetta hafi höfin gert nú í tuttugu ár. Afleiðing er sú að hitastig sjávar hefur aldrei mælst hærra, með gríðarlegum áhrifum á lífríki, kóralrif, sjávarstöðu, ísbreiður og veðurfar.

Samkvæmt skýrslunni var síðasta ár, árið 2025, annað til þriðja heitasta síðan mælingar hófust. Meðalhiti var 1,43 gráðum yfir meðalhita um iðnbyltingu. Öfgar í veðurfari hafa aukist í takt við þessa þróun. Vaxandi og sífellt óvenjulegri hitabylgjur, ofsarigningar og hitabeltisstormar, ásamt þurrkum og uppskerubrestum, valda nú mannkyni gríðarlegu tjóni á ári hverju. Leggja þarf höfuðáherslu á að draga hratt úr losun, auk þess sem grípa þarf til markvissra aðlögunaraðgerða að breyttum veruleika, að mati skýrsluhöfunda. Mörg fátækari ríki heims eru til dæmis án fullnægandi almannavarnakerfa, og því ekki hægt að bregðast þar við í tíma þegar ofsaveður skellur á. Slíkt margfaldar tjónið.

Skýrslan staðfestir að magn gróðurhúsalofttegunda í andrúmsloftinu heldur áfram að vaxa, að langmestu leyti vegna brennslu jarðefnaeldsneytis og annarrar iðju mannkynsins sem veldur losun eða minni bindingu slíkra lofttegunda. Magn koltvísýrings í andrúmsloftinu er komið í 424 ppm, miðað við mælingu 2024, og hefur vaxið um 152% síðan fyrir iðnbyltingu. Metan hefur aukist um 226% og nituroxíð um 125%.