Um ein og hálf milljón Ástrala búa á svæðum sem eru í verulegri hættu út af hækkandi sjávarmáli. Þetta kemur fram í nýju áhættumati vegna loftslagsbreytinga sem yfirvöld í Ástralíu hafa nú gefið út í fyrsta skipti. Um 600 þúsund manns búa á svæðum sem verða fyrir áhrifum af hækkandi sjávarmáli á allra næstu árum, eða fyrir 2030.

Í áhættumatinu, sem Loftslagsráð Ástralíu hefur lýst sem “hryllingssögu”, eru skoðaðar sviðsmyndir miðað 1,5 gráðu hlýnun, tveggja gráðu hlýnun og þriggja gráðu hlýnun, miðað við hitastig fyrir iðnbyltingu. Í fyrstu sviðsmyndinni hækkar sjávarmál um 14 cm en í þeirri þriðju um 54 cm, eða hálfan metra, fyrir miðja öld. Mest yrðu áhrifin í og við Queensland, í norðaustur hluta landsins.

Ef hitastig hækkar um tæpar þrjár gráður, eins og nú stefnir í, mun tíðni ofsaveðra jafnframt aukast til muna, einkum í Norður Ástralíu, með tilheyrandi áhrifum á íbúa, innviði og náttúru. Hitabylgjur munu færast mjög í vöxt og er til dæmis áætlað í skýrslunni að dauðsföll vegna hita aukist um 400% í Sidney, miðað við þriggja gráðu hækkun, og að þau tvöfaldist við eins og hálfs gráðu hækkun. 

Framkvæmdastjóri Loftslagsráðs Ástralíu, Amanda McKenzie benti á í viðtali við þarlenda fjölmiðla, af þessu tilefni, að niðurstöðurnar séu hræðilegar. Lestur skýrslunnar sé þess eðlis að ráðherrar ættu varla að geta sofið, slíkur væri hryllingurinn. “Að gera of lítið er í raun val, og við getum valið bjartari framtíð með því draga úr útblæstri hraðar og meira,” sagði McKenzie.

Kostnaðurinn vegna áhrifa loftslagsbreytinga í Ástralíu gæti orðið, varlega áætlað, um 40 milljarða dollara á ári um miðja öld. Það nemur um 5000 milljörðum íslenskra króna.  Markaðsvirði fasteigna gæti hæglega lækkað um ríflega 600 milljarða Bandaríkjadala, eða um 75 þúsund milljarða íslenskra króna.

Þá eru ótalin áhrifin sem loftslagsbreytingar hafa á vatnsbúskap og lífríki. Þurrkar munu aukast verulega og talið er að um 70% af lífverum muni þurfa að flytja sig, eða aðlagast eða deyja út. Áhrif á kóralrif og lífríki hafsins eru einnig talin gríðarleg, eins og raunar þegar gætir.

Það er því mikið í húfi fyrir Ástrali þegar kemur að aðgerðum til að sporna við útblæstri. “Kostnaður aðgerðarleysis verður alltaf meiri en kostnaður aðgerða,” sagði loftslagsráðherra Ástralíu, Chris Bowen, við fjölmiðla í tilefni skýrslunnar. 

Áætlun um aðlögun, og hvernig er hægt að komast hjá verstu afleiðingunum, er líka að finna í skýrslunni. Þar er lögð áhersla á það að styðja sérstaklega þá sem minnst mega sín, og beina fjármunum þangað sem áhættan er mest. Einnig þarf að endurskoða tryggingakerfið, þannig að það geti gagnast þeim sem búa við mikla hættu, á fjárhagslega sjálfbæran hátt. Fyllri aðgerðaráætlun, um aðlögun og aðgerðir vegna loftslagsbreytinga, verður birt fyrir lok næsta árs.

Í kjölfarið á skýrslunni hafa áströlsk stjórnvöld gefið út uppfærð markmið í loftslagsmálum, eða svokallað landsframlag (NDC).  Öll aðildarríki Parísarsamningsins eiga að gefa út slíkt uppfært markmið fyrir þrítugustu Loftslagsráðstefnu Sameinuðu þjóðanna sem fram fer í Brasilíu í nóvember.

Ástralir segjast munu draga úr útblæstri um 62 til 70 prósent, miðað við 2005. Það er lægra markmið en Loftslagráð Ástralíu (Climate Change Authority) hafði lagt til, en stofnunin lagði til lækkun um 65 til 75 prósent. Þó svo yfirvöld treysti sér ekki til að fara eftir því, er þó um að ræða metnaðarfyllsta loftslagsmarkmið Ástrala til þessa.

Þjóðir heims reyna nú hver og ein, að greina áhrif loftslagsbreytinga. Fyrir ári síðan gaf Evrópusambandið út slíkt áhættumat. Þar voru áhættur greindar í 36 flokka, og niðurstaðan sú að í mörgum flokkum væri ástandið þegar orðið uggvænlegt.